Аляксандр Антонавіч Гадуноў (2 верасня 1921 – 10 лютага 1994) – вучоны-эканаміст, доктар эканамічных навук (1977), прафесар Акадэміі ўпраўлення пры Савеце Міністраў Рэспублікі Беларусь (1979). Нарадзіўся ў вёсцы Фашчаўка ў сям’і селяніна. Закончыў сярэднюю школу і з атэстатам выдатніка паступіў на вучобу ў Ленінградскі ўніверсітэт, які закончыў ужо пасля вайны. У час Вялікай Айчыннай вайны – танкіст на фронце, гвардыі старшы лейтэнант, у апошні яе год – камандзір роты цяжкіх танкаў ІС-122. Атрымаў цяжкае раненне, пасля чаго на ўсё жыццё стаў інвалідам (страціў руку). У 1950 годзе скончыў Усесаюзны завочны юрыдычны інстытут. З 1950 г. на працягу 20 гадоў – у Ленінградскім дзяржаўным універсітэце – аспірант, прафесар, дэкан эканамічнага факультэта. На працягу 5 гадоў займаў пасаду загадчыка кафедры кіравання вытворчасцю Ленінградскага інжынерна-эканамічнага інстытута імя П.Тальяці. У 1976 г. па запрашэнню ён пераязджае ў Мінск, у Беларускі дзяржаўны інстытут народнай гаспадаркі, дзе да 1991 г. займаў пасаду загадчыка кафедры кіравання. З 1991 г. працаваў у Акадэміі кіравання. Памёр А.А. Гадуноў 10 лютага 1994 г. Пахаваны на радзіме.    
    Ратны і працоўны шлях А. А. Гадунова адзначаны шэрагам высокіх узнагарод Радзімы – ён узнагароджаны ордэнам Аляксандра Неўскага, ордэнам Айчыннай вайны I і II ступені, медалямі і ганаровымі граматамі.
    А.А. Гадунову належаць навуковыя працы па ўдасканаленні структуры і метадаў кіравання. З’яўляецца заснавальнікам навукова-педагагічнай школы кіравання вытворчасцю Беларускага дзяржаўнага эканамічнага ўніверсітэта. Падрыхтаваў 13 кандыдатаў эканамічных навук. З’яўляецца аўтарам больш чым 50 навуковых прац.

Сярод апублікаванага:
    Введение в теорию управления: (cистема промышленного производства) / А. А. Годунов. – Москва : Экономика, 1967. – 280 с.
    Вопросы теории управления производством. – Л., 1969.
    Методика оценки деловых и морально-политических качеств руководителей и специалистов промышленных предприятий / А. А. Годунов, П. С. Емшин ; Ленинградский государственный университет им. А. А, Жданова, Научно-исследовательский институт комплексных социальных исследований, Лаборатория социальных проблем управления. – Ленинград: [б. и.], 1970. – 23 с.; 21 см. 
    Социально-экономические проблемы управления социалистическим производством. – М., 1975.
    Роль науки управления социалистическим производством. – Мн. 1986.

    Гадуноў Аляксандр Антонавіч // Беларуская энцыклапедыя: у 18 т. / Рэдкалегія : Г. П. Пашкоў і інш. – Мн.: БелЭн, 1997. – Т. 4: Варанецкі – Гальфстрым. – С. 422.

    Гадуноў Аляксандр Антонавіч // Памяць : гісторыка-дакументальная хроніка Шклоўскага раёна. – Мінск : Універсітэцкае, 1998. – С. 441.

    Памяці земляка : аб жыцці і дзейнасці вучонага-земляка А. А. Гадунова // Ударны фронт. – 1994. – 19 лютага. – С. 3.